Dövlət Vergi Xidməti 2025-ci ildə dövlət büdcəsinə ən çox vergi ödəyən və bu məlumatın ictimaiyyətə təqdim edilməsinə razılıq verən vergi ödəyicilərinin, həmçinin 2025-ci il üzrə dolayı vergilər (ƏDV, aksiz) istisna olmaqla hesablaması ən çox olan və bu barədə məlumatın açıqlanmasına razılıq verən 100 vergi ödəyicilərinin siyahısını hazırlayıb.

Bu barədə "APA-Economics"ə qurumdan məlumat verilib.

Bildirilib ki, siyahı hazırlanarkən büdcə təşkilatları nəzərə alınmayıb.

Siyahının ilk onluğunda aşağıdakı şirkətlər yer alıb:

Belə ki, siyahıya 1 milyard 508 milyon manat vergi ödənişi ilə Azərbaycan Respublikası Dövlət Neft Şirkətinin "Azneft" İstehsalat Birliyi başçılıq edib. İkinci yerdə 697 milyon manat ödənişlə "Tabaterra" Məhdud Məsuliyyətli Cəmiyyəti, üçüncü yerdə isə 662,7 milyon manat vergi ödənişi ilə Bp Eksploreyşn (Azərbaycan) Limited Şirkətinin Azərbaycan Respublikasındakı Nümayəndəliyi qərarlaşıb.

Dördüncü yerdə 435,2 milyon manat ödənişlə "Lukoyl Oversiz Şah Dəniz Ltd." Şirkətinin Bakıdakı Nümayəndəliyi, beşinci yerdə 429,9 milyon manat ilə Türkiyə Respublikasının "Turkish Petroleum Overseas Company Ltd" Şirkətinin Azərbaycan Respublikasındakı Nümayəndəliyi yer alıb.

Siyahının davamında altıncı yerdə 327,4 milyon manat vergi ödənişi ilə "South Caucasus Pipeline Company Limited" Şirkətinin Azərbaycan Respublikasındakı Nümayəndəliyi, yeddinci yerdə 211,7 milyon manat ilə "Naftiran Intertrade Co. (NICO) Limited" Şirkətinin Azərbaycan Respublikasındakı Nümayəndəliyi qərarlaşıb.

200,9 milyon manat vergi ödənişi ilə Azərbaycan Respublikası Dövlət Neft Şirkətinin Qaz İxrac İdarəsi səkkizinci yerdə, 164,5 milyon manat ilə Bp Eksploreyşn (Kaspian Si) Limited Şirkətinin Azərbaycan Respublikasındakı Nümayəndəliyi doqquzuncu yerdə, 148,9 milyon manat vergi ödənişi ilə "Azərbaycan (Eysc) Limited" Şirkətinin Nümayəndəliyi isə onuncu yerdə olub.

Tam siyahı ilə aşağıdakı keçid vasitəsilə tanış olmaq mümkündür:
https://www.taxes.gov.az/uploads/Top100/2025_1.pdf