Azərbaycanda ən ucuz kreditlərin verildiyi regionlar açıqlanıb.

FED.az biznes və maliyyə xəbərləri portalı xəbər verir ki, ən ucuz kreditlərin verildiyi iqtisadi rayonların başında Bakı gəlir. Paytaxtda orta faiz dərəcəsi 12,91%, kredit portfeli isə 22 milyard 749 milyon 621 min manat təşkil edib.

İkinci yerdə Şərqi Zəngəzur iqtisadi rayonu qərarlaşıb – burada orta faiz dərəcəsi 14,51%, həcm isə 24 milyon 414 min manat olub.

Naxçıvan iqtisadi rayonu 15,47% dərəcə ilə üçüncü sıradadır. Regionun kredit portfeli 494 milyon 216 min manat təşkil edib.

Dördüncü sırada Abşeron-Xızı iqtisadi rayonu yer alıb – burada orta faiz dərəcəsi 16,53%, kredit portfeli isə 1 milyard 215 milyon 330 min manat olub.

Beşinci pillədə Gəncə-Daşkəsən iqtisadi rayonu (17,88%) qərarlaşıb. Region üzrə kredit qoyuluşu 905 milyon 246 min manat təşkil edib.

Altıncı yerdə Şəki-Zaqatala iqtisadi rayonu gəlir – orta faiz dərəcəsi 17,92%, kredit portfeli 605 milyon 3 min manat olub.

Yeddinci sırada isə Quba-Xaçmaz iqtisadi rayonu (18,06%) yer alıb. Burada kredit qoyuluşunun ümumi həcmi 521 milyon 629 min manat təşkil edib.

Azərbaycanda ən bahalı  kreditlərin verildiyi regionlar isə bunlardır:

Azərbaycanın bu regionlarında verilən kreditlərin faiz dərəcələri ölkə üzrə orta göstəricidən xeyli yüksəkdir. Ölkə üzrə kreditlərin orta faiz dərəcəsi 14,23% olduğu halda, bəzi regionlarda bu rəqəm 20%-i keçir.

Renkinqə Dağlıq Şirvan iqtisadi rayonu başçılıq edir. Bu regionda kreditlər üzrə orta faiz dərəcəsi 20,24% təşkil edir. Region üzrə kredit portfelinin həcmi isə 210 milyon 950 min manat olub.

İkinci yerdə Mərkəzi Aran iqtisadi rayonu qərarlaşıb. Burada əhali və sahibkarlar kreditləri orta hesabla 19,88% dərəcəsi ilə əldə ediblər. Regionun kredit portfeli 606 milyon 898 min manat təşkil edib.

Qarabağ iqtisadi rayonu 19,83% faiz dərəcəsi ilə üçüncü sırada yer alıb. Bu regionda kredit qoyuluşunun həcmi 526 milyon 43 min manat olub.

Dördüncü sırada Şirvan-Salyan iqtisadi rayonu dayanır – burada orta faiz dərəcəsi 19,79%, kredit portfeli isə 465 milyon 552 min manat təşkil edib.

Siyahının beşinci pilləsində Lənkəran-Astara iqtisadi rayonu (19,74%) qərarlaşıb. Bu bölgədə kredit qoyuluşunun həcmi 711 milyon 46 min manat olub.

Altıncı yerdə Qazax-Tovuz iqtisadi rayonu gəlir. Bu regionda orta faiz dərəcəsi 19,67%, kreditlərin ümumi məbləği isə 583 milyon 588 min manat təşkil edib.

Yeddinci sırada isə Mil-Muğan iqtisadi rayonu (19,47%) yer alıb. Burada kredit portfelinin həcmi 360 milyon 518 min manat olub.