“Lamborghini” Bakıda yeni şou-rumunun rəsmi açılışını etdi

29.09.2022
693

Sentyabrın 28-də İtaliyanın “Lamborghini” superkar istehsalçısı Bakıda öz yeni şou-rumunun rəsmi açılışını edib.

Bakının Zərifə Əliyeva küçəsi 31 ünvanında yerləşən şou-rumun ərazisi 225 kvadrat metr təşkil edir. Brendin ən yeni texnologiyaları ilə təchiz olunmuş şou-rumu maksimum rahatlığı və məxfi atmosferi təmin edəcək şəkildə layihələndirilib.

Burada avtomobil həvəskarlarına eksklüziv dairəvi təcrübə təklif edilir. Şirkətin təlim almış mütəxəssisləri müştərilərə yeni və artıq hazır “Lamborghini” modellərini təklif edərək, onlara seçimlərində dəstək göstərirlər. Potensial müştərilər fərdiləşdirmə proqramı çərçivəsində məhsulların çeşidləri ilə tanış ola bilir. Eyni zamanda onlar "Ad Personam" adlanan ehtiyatlandırılmış zonada öz fərdi konfiqurasiyalarını yaratmaq imkanına malikdirlər. Bu proqram çərçivəsində sahibləri demək olar ki, limitsiz boya çeşidləri, həmçinin dəri, xüsusi tikişlər, karbon lif elementləri və yeni avtomobilləri üçün bir çox başqa özəl seçimlər gözləyir.

Yeni şou-rumun rəsmi açılışı ilə əlaqədar olaraq təşkil olunan təntənəli tədbirdə Avropa, Yaxın Şərq və Afrika (EMEA-Europe, Middle East and Africa) regionunun rəhbəri Françesko Kreşçi və Mərkəzi, Qərbi Avropa və MDB-nin rəhbəri Feliks Rongen iştirak ediblər.

Tədbirdəki çıxışında Françesko Kreşçi “Volkswagen Group”un tərkib hissəsi olmağın təmsil etdiyi şirkətə böyük üstünlüklər qazandırdığını bildirib.

Onun sözlərinə görə, rəqabətin çox yüksək olduğu müasir dünyada çalışmalısan ki, ən son texnologiyalardan istifadə edəsən: “Ən qabaqcıl texnologiyalara çıxış əldə etmək istəyirsinizsə, daha mütərəqqi olmaq istəyirsinizsə böyük qrupun tərkib hissəsi olmaq ən düzgün yollardan biridir. Bu, sənə müxtəlif innovasiyalara çıxış əldə etməyə və bu zaman xərclərinə qənaet etməyə imkan verir. Ən özəl xüsusiyyət isə ondan ibarətdir ki, “Volkswagen Group” sahib olduğu şirkətlərə müəyyən müstəqillik verir. Belə ki, “Lamborghini”nin özünün dizayn, tədqiqat və inkişaf mərkəzləri mövcuddur. Digər tərəfdən qrupa daxil olan brendlər bir-birinin müştəri portfoliosuna müdaxilə etmədən bizneslərini inkişaf etdirirlər. Bu mənada alman və italyan brendlərinin belə bir şəkildə birgə əməkdaşlığı bu gün üçün nümunəvidir”.

“Lamborghini Baku” şou-rumunun rəsmi açılışından məmnunluğunu ifadə edən Feliks Rongen Bakıya tez-tez gələcəyinə inamını ifadə edib: “Bu, Bakıya artıq ikinci səfərimdir. Daha əvvəl buraya ötən ayın əvvəlində gəldim. Qısa zaman kəsiyində gördüklərimdən belə bir fikir formalaşıb ki, şəhərlə onun əhalisi vəhdət təşkil edir. Bu özünü müasirlik və tarixi köklərə bağlılıqda biruzə verir. Belə ki, Bakı müasir şəhər olmaqla yanaşı, öz tarixi görkəmini qoruya bilib. Şəhərin zahiri görünüşü insanlarda da öz əksini tapır. Onlar da həm müasir yönümlüdür, gələcəyə istiqamətlidirlər həm də tarixlərini və milli-mədəni identifikliyini görumağa çalışırlar. Bu aspekt “Lamborghini” olaraq bizə çox yaxındır. Çünki biz də analoji yanaşmanın tərəfdarıyıq. Yəni gələcəyə baxışla bərabər, dəyərlərini, əsasını qorumalısan. Bütövlükdə həm şəhəriniz həm də insanlarınız haqqında təssüratlarım çöx müsbətdir. İnsanlarda emosiyalar çox bariz şəkildə özünü biruzə verir. Onların arasında paxıllıq və sair bu kimi mənfi hisslər müşahidə etmədim. Buna görə düşünürəm ki, bura tez-tez gələcəm”.

Daha sonra Françesko Kreşçi və Feliks Rongen birlikdə VIP qonaqlara yeni istifadəyə verilmiş “Lamborghini Huracán Tecnica” avtomobilini təqdim ediblər.

Tədbir "KHAMSA" restoranında təşkil olunmuş qala yeməyi ilə davam edib. Qurmanların dadlı təcrübəsi tanınmış və sevilən ifaçıların çıxışları ilə müşayiət olunub.

Bu gün “Lamborghini”nin dünya üzrə 174, o cümlədən EMEA regionunda 74 diler mərkəzi mövcuddur. Brendin avtomobilləri hal-hazırda Bakıda Azərbaycan üçün eksklüziv əsasda təqdim olunur.
29.09.2022
693