«Facebook» və «İnstagram»ın sahibi olan Meta şirkəti Instagram Direct mesajlarında başdan-başa şifrələməni (E2EE) deaktiv edib.

FED,az biznes və maliyyə xəbərləri portalı xəbər verir ki, bu barədə şirkət özü məlumatı yayıb. Mesajların başdan başa şifrələnməsi əvvəllər "məxfiliyin qızıl standartı" adlandırılsa da, Meta indi siyasəti dəyişib. Şifrələnmənin ləğv edilməsi o deməkdir ki, artıq «Meta»nın əməkdaşları İnstagram istifadəçiləri arasındakı söhbətlərin məzmununa baxa, o cümlədən mətn, foto, video və səsli mesajlara daxil ola biləcəklər.

İnstagram mesajlarında şifrələnmənin ləğv edilməsi «Meta»nın şifrələmə ilə bağlı siyasətinin dəyişdiyini göstərir. Qeyd edək ki, şirkət 2019-cu ildə şifrələməni və məlumat təhlükəsizliyini siyasətinin əsas elementi elan etmişdi. Bu siyasət çərçivəsində əvvəlcə «Facebook Messenger»də E2EE standartı tətbiq edilib, daha sonra isə eyni standart Instagram-da tətbiq eedilmişdi. İndi isə Instagram Direct üçün başdan-başa şifrələməni məcburi etmək planları ləğv edilib.

«Meta»da bu addımı funksiyanın geniş istifadə olunmadığını - çox az istifadəçinin onu aktivləşdirdiyi ilə izah ediblər. Bununla yanaşı, analitiklər bildirir ki, şifrələmənin ləğs edilməsi reklam məqsədilə bağlıdır. Belə ki, şəxsi söhbətləri izləmək potensial olaraq reklam sistemləri və şirkətin süni intellekt məhsullarının inkişafı üçün məlumatların dəyərini artırır.

Maraqlıdır ki, «Meta»nın bu qərarını dəstəkləyənlər var. Məsələn uşaq hüquqları təşkilatları bu qərarı dəstəkləyiblər, onlar bildirir ki, şifrələmənin olmaması uşaqların istismarı hallarının müəyyən edilməsini asanlaşdıra bilər.