İnkişaf etmiş və inkişaf etməkdə olan ölkələrin öhdəliklərini, o cümlədən dövlətlərin, ev təsərrüfatlarının, maliyyə və qeyri-maliyyə şirkətlərinin borclarını əhatə edən qlobal borc 2025-ci ildə 29 trilyon dollar artaraq 348.3 trilyon dollara yüksəlib. Bu barədə Beynəlxalq Maliyyə İnstitutunun (IIF) məlumatında bildirilir. Artım əsasən suveren öhdəliklərin yüksəlməsi ilə bağlı olub — bunun 10 trilyon dollardan çoxu dövlət borcunun payına düşüb. Artımın təxminən dörddə üçü ABŞ, Çin və Avrozona ölkələrinin payına düşüb.

Qlobal borcun artımı hazırda daha çox ev təsərrüfatları və ya şirkətlərin borclanması ilə deyil, dünyanın ən böyük iqtisadiyyatlarında büdcə kəsirlərinin davam etməsi ilə əlaqələndirilir.

Ötən il borcun ÜDM-ə nisbəti 308%-ə qədər azalıb ki, bu da əsasən inkişaf etmiş iqtisadiyyatlı ölkələrin hesabına baş verib. İnkişaf etməkdə olan ölkələrdə isə bu göstərici rekord səviyyəyə — ÜDM-in 235%-nə çatıb.

2025-ci ilin sonuna dövlət borcu əvvəlki ilin 96.3 trilyon dolları ilə müqayisədə 106.7 trilyon dollar təşkil edib. Qeyri-maliyyə şirkətlərinin borcu 100.6 trilyon dollara, ev təsərrüfatlarının borcu isə 64.6 trilyon dollara yüksəlib.

Yetkin bazarlarda ümumi borc 231.7 trilyon dollara, inkişaf etməkdə olan bazarlarda isə rekord 116.6 trilyon dollara çatıb.

Əgər büdcə kəsirləri yüksək olaraq qalarsa və şirkətlər kapital xərclərini istiqraz emissiyaları vasitəsilə maliyyələşdirməyə davam edərsə, 2026-cı ildə qlobal borcun həcmi artmaqda davam edəcək.

IIF-in qiymətləndirməsinə görə, bu il inkişaf etməkdə olan bazarlarda 9 trilyon dollardan çox borcun ödənilməsi tələb olunacaq ki, bu da tarixdə ən yüksək yenidən maliyyələşdirmə həcmidir. Yetkin bazarlarda isə istiqrazlar və kreditlər üzrə 20 trilyon dollardan çox ödəniş gözlənilir.